الأحد، 6 أبريل، 2008


انا مضرب انا مضرب احسن ما أكون مضروب

قاعد في بيتي وناوي عمري ما أكون مغلوب

خافوا الكلاب من عنتر ولاخافوا من شيبوب

مفضلش غير لقمتي باكلها وانا مغصوب

ده الخوف طبع الجبان والنخوة شيئ مطلوب

رأيي هقوله بصراحة لوحتى هأكل طوب

اما ينعدل حالنا او الكرامة تدوب

مفضلش شيئ نافع ومعدش صوت طالع والهرم صبح مقلوب

انفض بقى همتك ده كل شيئ مكتوب

اخلص معايا بقلبك ده الرب رب قلوب

ايدي في ايدك نعتصم الباطل يصير مغلوب

الجمعة، 4 أبريل، 2008



يوم الحد الجاي 6 ابريل

اضــــــــــــــــــــــراب عــــــــــــــــــــــــــــام

ما تنزلش من بيتك

ما تروحش الشغل

ما تروحش المدرسة

ما تروحش الكلية

ما تفتحش المحل بتاعك

ما تشتريش حاجة


مرة واحدة نعمل حاجة مع بعض
مرة واحدة نتحرك مع بعض
مرة واحدة نبطل سلبية و نشارك مع بعض في عمل جماعي عشان البلد
عشان الاسعار اللي بتزيد كل يوم
عشان الناس الغلابة اللي مش لاقية العيش الحاف
عشان الفساد اللي مالي البلد
عشان الشباب العاطل اللي بيرمي نفسه في اي مركب خارج من مصر عشان يخلص من الغلب اللي هوه فيه
عشان الفقر اللي كفر الناس و خلاهم يولعوا في نفسهم و في عيالهم عشان مش لاقيين يأكللوهم
عشان ندي الناس أمل ان النظام اللي اتسبب في كل ده ممكن يتشال لو كلنا بطلنا سلبية و شاركنا
يا ريت كل اللي يقدر يشارك يشارك
و كله يبلغ صحابه و قرايبه و اخواته و جيرانه
عايزين مصر كلها معانا يوم 6 ابريل
كله يضرب عن الشغل و يقعد في بيته
و اللي يقدر يشارك في المظاهرات اللي هتبقي في الشوارع يبقي عمل احلي واجب
ما تخافش مش هتبقي الوحدك
ان شاء الله كلنا مع بعض في الاضراب
كلناهنحاول نطلع في المظاهرات
لازم يبقي فيه امل ان البلد تتغير علي ادينا
ما تقولش : يعني هوه انا اللي هاغير البلد
ايوه انت اللي تقدر تغيرها
لو كل واحد فينا شارك هنغيرها ان شاء الله

بسم الله الرحمن الرحيم
﴿ إن الله لايغير ما بقوم حتى يغيروا مابأنفسهم ﴾
صدق الله العظيم

السبت، 1 مارس، 2008

ســــامـــــحـــونـــــــا
=============

91 شهيد فلسطيني
منهم 14 طفل
و العدد كل شوية بيزيد
و الناس - و انا منهم - كل اللي بيفكروا فيه الحضري و هرب ازاي و هيرجع امتي و ادارة الاهلي هتعمل ايه !!!!
يا خي ملعون ابو دي بلد اللي الناس عايشة فيها و ملهاش اي دعوة باللي بيحصل للناس اللي بيتدبحوا جنبنا ع الحدود
و ما بيتجمعوش الا عشان يرقصوا عشان المنتخب او عشان يستقبلوا الحضري او غيره في المطار
و يوم ما نتحمق يكون عشان الرسومات المسيئة للرسول - صلي الله عليه و سلم -
خلاص التدين مقطع بعضه أوي
و برضه بتبقي هوجة و تخلص
انما الناس اللي بتموت دي ......... و لا كأن فيه حاجة
و لا حول و لا قوة الا بالله
يا تري ربنا هيعمل فينا ايه يوم القيامة
هنعمل ايه لما يسألنا عن الناس دي
الواحد مش عارف يقول ايه
أنا مكسوف من نفسي أوي
حسبي الله و نعم الوكيل في كل واحد فينا
حسبي الله و نعم الوكيل في كل كلب من الحكام اللي قاعدين علي عروشهم و ما اتحركوش عشان يعملوا حاجة للناس دي
اخواننا في غزة .... سامحونا
احنا شعب مات معنويا من زمان
ربنا يرحمنا
ملكمش غير ربنا
احنا خلاص..........................

















شعب ٌ يُباد ُ بغزَّة ٍ ، وقيادة ٌ مأجورة ٌ وضميرُها مَفقود ُ
يتساقط الأطفال ُ مِثْل َ تساقط ِ الأوراق ِ عن ْ أشجارِها وتَبيد ُ
وعلى الحقول ِ تبعثرت ْ أشلاؤهم لم يَنْج ُ منهم والد ٌ ووليد ُ
شعْب ٌ بأكملِه ِ يُساق ُ لحَتَفِه ِ وقيادة ٌ .. بالقاتلين َ تُشيد
...........................................................................................

الخميس، 21 فبراير، 2008

- ياللا نــنـور غــــــزة
- ياللا نطيح في الطلبة
==============




يوم الاثنين 18-2- 2008 بعد الظهر

امام المجمع الطبي بجامعة الاسكندرية
مجموعة طلبة خارجين من الجامعة
و فجأة ........

بلطجية نازلين من عربية اسعاف و من ميكروباص هجموا عليهم
شتايم
اهانة
ضرب
شلاليت
سحل
اللي لحق يهرب هرب اللي ملحقش اتسحب علي عربية الاسعاف و طلعوا بيهم علي قسم سيدي جابر و رموهم هناك في الحجز.

فهمت حاجة ؟؟؟؟؟!!!!!

لأ طبعا

عشان تفهم لازم نرجع لورا شوية .

..........................................

البداية كانت من شهر تقريبا

حصار غزة

قطع الكهرباء عنها

اهل غزة جعانين

بردانين


في الضلمة عايشين

مفيش كهرباء

مفيش مستشفيات او اجهزة طبية قادرة تشتغل من غير الكهرباء

مرضي كتير ماتوا لان حياتهم كانت معتمدة علي الاجهزة الطبية دي

كسر الحصار

احداث اثرت في العرب و المسلمين في كل حتة

فيه اللي اكتفي بالتعاطف بس

و فيه اللي اتحرك و حاول يعمل حاجة يساعد بيها الناس اللي بتموت في غزة

و من اللي اتحركوا طلبة الاخوان المسلمين في جامعة الاسكندرية

و ابتدي نشاط الحملة اول ما ابتدي الترم التاني

تبرعات من الطلبة

بيع تيشرتات مكتوب عليها - تعاطفا مع غزة - زي اللي بينها تريكة قدام العالم في كاس العالم و تخصيص الربح من التيشرتات دي عشان خاطر الحملة.


طبعا مهما تختلف مع الاخوان ,طبعا لازم تفرح باللي بيعملوه ده و تساعدهم علي قد ما تقدر

طلبة الاخوان في المجمع الطبي قرروا يعملوا حفلة فنية عشان غزة , و قرروا انها تكون يوم الاتنين
18 - 2 - 2008 الساعة 12 و نص تحت المبني الاكاديمي في كلية الطب.

و فعلا عملوا الحفلة :اناشيد و مسرحيات و معارض فنية بتعبر عن الوضع في فلسطين

وكل ده عشان خاطر غزة

الحفلة خلصت و الطلبة لموا الميكروفونات و العدة و خرجوا من الكلية و هما حاسيين بالرضا عن اللي عملوه

و اول ما خرجوا من باب الكلية حصل اللي حكيناعنه في اول البوست

عربية الاسعاف نزل منها بلطجية و طاحوا في الطلبة و مسكوا 13 طالب من طلبة طب و صيدلة و خدوهم ع القسم و رموهم هناك زي اي مجرم او نشال
كل ذنبهم انهم حاولوا يعملوا حاجة يخدموا بيها الناس اللي بتموت في غزة

الناس دي لو كانوا طالعين من حفلة لهيفا او نانسي كان هيتعمل فيهم كده ؟؟!!

لو كانوا بيلموا تبرعات تبع الروتاري او الليونز كان هيحصل فيهم كده ؟؟!!

حسبي الله و نعم الوكيل

الناس دي لسه ما طلعتش لغاية دلوقتي

ربنا يفك سجنهم و يطلعوا ان شاء الله



..............................................................................

صور من المظاهرات اللي طلعت في المجمع الطبي تاني يوم تضامنا مع الطلبة المعتقلين









....................................................................................



الجمعة، 15 فبراير، 2008

قــــال ايـــه عـــايــزيــــن يـاخــدوه .. !!!!!!!!
=====================================


يوم الأحد 10 -2 - 2008


الساعة 7 بالليل


نهائي كأس الامم الافريقية - مباراة مصر و الكاميرون


شوارع مصر كلها فاضية


كله قاعد قدام التلفزيون


اللي في بيته و اللي في كافيه و اللي علي قهوة


اللي ليه في الكورة و اللي ملهوش


كله قاعد بيتفرج و بيدعي

............................


بعديها بساعتين ...

نفس الشوارع بس مليانة ناس


كبار و صغيرين , ولاد و بنات


فرحة هستيرية غير عادية


مصر بطلة افريقيا 2008


فرحة في كل حتة و في كل شارع


في اسكندرية مثلا كل الشعب طلع ع الكورنيش


ناس من لوران و سان ستيفانو و باكوس و غبريال و ميامي و ستانلي و بحري و كرموز


مفيش فرق . كله فرحان


هتشوف مليون منظر و انت ماشي ع الكورنيش


عربية نص نقل شايلة ييجي 30 واحد عمالين يرقصوا و يهيصوا

عربية ماتريكس طالع من الشباك بتاعها مزتين ماسكين اعلام مصر و راسمينه علي وشهم و الحاج الوالد سايق و هوه اخر انبساط

اللي مولع صواريخ و اللي مولع في سلك مواعين

اللي ماسك علم مصر و اللي ماسك علم الاهلي او الزمالك - مش فارقة اي حد بيجيب اي علم يلاقيه في البيت

هتافات من كل شكل و لون بدون رقابة

يا ايتو روح ..... امك اتخطفت

ما تستغربش لما تلاقي عيل صغير عنده 4 سنين ماشي بيقول : *** .. **** ... قال ايه عايزين ياخدوه

عادي يعني خليك لارج

مناظر مش ممكن تشوفها الا كل فين و فين


.........


الله يرحم قبل البطولة

مكنش حد متوقع اننا نوصل دور ال4 اساسا

كل اللي بيفهموا في الكورة عارف اننا كان اخرنا دور ال8 , و فيه ناس توقعت اننا مش هنعدي دور المجموعات من اساسه

و ده طبعا مش من فراغ :

معانا مدير فني الشعب كله تقريبا مقتنع انه اي كلام و ماشية معاه حلاوة من كاس الامم اللي فاتت

دفاعنا شوربة وكفاية ماتش انجولا الودي اللي فلافيو كان مروق فيه وائل جمعة

الليبرو بتاعنا قصير و محدش ناسي اللي عمله معاه عشيو في ماتش الجزائر من4 سنين

الباك الشمال اللي حيلتنا علي قده , و الباك الشمال البديل اللي لعب كل الماتشات الودية - اسامة محمد - المعلم حسن شحاتة قلشه و جاب بداله طارق السيد ما تعرفش ليه

الفرق التانية مش جاية تهزر و اولهم كوتديفوار

كله عارف ان مالناش نصيب خالص المرة دي
................

و ابتدت البطولة :

4 في الكاميرون
3 في السودان
1-1 مع زامبيا و طالعين اول مجموعة و رجل علي رجل
2 في انجولا

كله قالك بس كفاية لحد هنا يا معلم
دي كوتديفوار يا جماعة مش جاية تهزر
انا شخصيا كنت متوقع النتيجة 4-1 ..... لكوتديفوار طبعا
لكن المنتخب سكتنا كلنا و لبسهم 4-1
و في الفاينال خلصنا ع الكاميرون بجون يلخص كل اللي منتخب عمله في البطولة دي

قمة الرجولة من زيدان

و قمة الهدوء و التركيز من تريكة

و حطينا الكاس في جيبنا و روحنا

و كل الكلام اللي كان بيتقال قبل البطولة اتغير تماما

حسن شحاتة بقي احسن مدرب في تاريخ مصر
سيد معوض و هاني سعيد بقوا لعيبة عالمية
الحضري و عبد ربه و عمرو زكي خلاص اماكنهم محجوزة في الارسنال و مانشستر
كل واحد يطلع في التلفزيون و يقولك يا جماعة انا كنت متوقع ان متخبنا ياخدها قبل البطولة
كل اللي كانوا بيهاجموا حسن شحاتة خدوه بالحضن و هاتك يا تصوير
سمير زاهر بقي احسن رئيس اتحاد كورة في تاريخ مصر - طبعا مش جايب لنا في عهده 3 كاس امم 98 , 2006 , 2008 - بالرغم من ان كل اللي بيتابعوا كورة في مصر عارفين سمير زاهر ده ايه
كل مغني دخل في الليلة و ضربله اغنية و نزل بيها عشان يعمل لنفسه شو
اي حد كان بيلعب كورة او بيلعب كورة بيطلع يحلل ماتشات مصر - ده انا سمعت ان احمد سلامة طلع يحلل ما هو دولي بقي-
............................

نشوف بقي تكريم المنتخب
طبعا تكريم السيد الرئيس راعي الرياضة و الرياضيين ده شيء مفروغ منه
و محدش ينسي افضاله و متابعته هوه و انجاله للمنتخب اللي لولاهم مكنش المنتخب عمل حاجة


نتكلم عن التكريم العربي

الناس اللي استنت المنتخب في المطار اتكروتت و شحنوا المنتخب في اوتوبيس مقفول بدل الاوتوبيس المفتوح اللي كانوا ناويين عليه
مش مهم الناس اللي في مصر اللي نفسها تفرح بلاعيبتها
المهم الدولارات بتاعت الخليج
طبعا المنتخب و اتحاد الكورة خدوا الطيارة و طيران علي دبي
و الهلس ابتدي
الامير الفاضل يسلم علي كل لاعب و يديله صندوق في ايديه
الحضري متحزم بعلم مصر و بيرقص
عمرو زكي و شادي بيرقصوا علي انغام مطرب مصر سعد الصغير
و كله طبعا فرحان .... مش هيقبضوا ؟؟؟!! بس خلاص .
وطبعا اللفة دي بتتكرر علي كل امير او مليونير عربي
مع ان من الذوق ان اللي عايو يكرمنا يجيلنا بلدنا
بس ما دام فيها فلوس فاتحاد الكورة مستعد يروح اي حتة
............
ما علينا
المهم مبروك لمنتخبنا و ربنا يستر في كاس القارات مع ايطاليا و البرازيل
اول مرة الواحد يحس ان المنتخب ممكن يتأهل كاس عالم
يا رب ...... نفسي اشوف مصر في كاس العالم
المرة الوحيدة اللي طلعت فيها في عصرنا الحديث كان سنة 90 و ساعتها كان عندي سنة .
.....................


*امام الجامع بتاعنا بعد ماتش مصر و كوتديفوار و الفرحة اللي كانت في الشوارع طلع في خطبة الجمعة و طاح في الناس اللي كانت فرحانة:
امة تافهة - شعب سفيه - كل هذا من اجل بعض الشباب في مباراة كرة ...... !!!!!!

يعني المفروض نولع في نفسنا مثلا؟؟؟!!!!
حرام يعني نفرح شوية؟؟؟!!

اي شعب في الدنيا هتلاقي عنده الافراح دي بعد اي انتصار كروي
سواء كان شعب متقدم زي ايطاليا او متخلف زي انجولا
متدين زي ايران او منحل زي اي دولة اوروبية
شيء طبيعي جدا
و الفرحة دي بتبقي اكتر لما يكون الشعب مقهور و مكبوت زي حالاتنا و مفيش حاجة بتفرحه الا الكورة
فما تطلبش من الناس انها تقعد في بيوتها يعني لما المنتخب يكسب .

بس برضه لو جيت تفكر شوية في كلام الشيخ هتلاقيه مش غلط اوي .

لو ربع اللي طلعوا عشان المنتخب دول طلعوا في مظاهرة او عملوا اضراب او عملوا اي حاجة ايجابية بنفس الحماس ده اعتقد البلد كان هيبقي فيها امل اكتر من السلبية اللي احنا فيها دي .
ربنا يتولانا برحمته.
.................

* خلاص راحت ايام كاس الامم دروجبا و توريه و السكتيوي و ايسين .... و رجعنا للدوري العام و اشرف شيحة و محمود سمنة و السيد الثعلبي و التخلف ده .
الصبر من عندك يا رب.

*من الدروس المستفادة من البطولة : اوعي تنزل الملعب و انت مش لابس حاجة تحت الشورت