يوم الاثنين 18-2- 2008 بعد الظهر
امام المجمع الطبي بجامعة الاسكندرية
مجموعة طلبة خارجين من الجامعة
و فجأة ........
بلطجية نازلين من عربية اسعاف و من ميكروباص هجموا عليهم
شتايم
اهانة
ضرب
شلاليت
سحل
اللي لحق يهرب هرب اللي ملحقش اتسحب علي عربية الاسعاف و طلعوا بيهم علي قسم سيدي جابر و رموهم هناك في الحجز.
فهمت حاجة ؟؟؟؟؟!!!!!
لأ طبعا
عشان تفهم لازم نرجع لورا شوية .
..........................................
البداية كانت من شهر تقريبا
حصار غزة
قطع الكهرباء عنها
اهل غزة جعانين
بردانين
في الضلمة عايشين
مفيش كهرباء
مفيش مستشفيات او اجهزة طبية قادرة تشتغل من غير الكهرباء
مرضي كتير ماتوا لان حياتهم كانت معتمدة علي الاجهزة الطبية دي
كسر الحصار
احداث اثرت في العرب و المسلمين في كل حتة
فيه اللي اكتفي بالتعاطف بس
و فيه اللي اتحرك و حاول يعمل حاجة يساعد بيها الناس اللي بتموت في غزة
و من اللي اتحركوا طلبة الاخوان المسلمين في جامعة الاسكندرية
و ابتدي نشاط الحملة اول ما ابتدي الترم التاني
تبرعات من الطلبة
بيع تيشرتات مكتوب عليها - تعاطفا مع غزة - زي اللي بينها تريكة قدام العالم في كاس العالم و تخصيص الربح من التيشرتات دي عشان خاطر الحملة.
طبعا مهما تختلف مع الاخوان ,طبعا لازم تفرح باللي بيعملوه ده و تساعدهم علي قد ما تقدر
طلبة الاخوان في المجمع الطبي قرروا يعملوا حفلة فنية عشان غزة , و قرروا انها تكون يوم الاتنين 18 - 2 - 2008 الساعة 12 و نص تحت المبني الاكاديمي في كلية الطب.
و فعلا عملوا الحفلة :اناشيد و مسرحيات و معارض فنية بتعبر عن الوضع في فلسطينوكل ده عشان خاطر غزة
الحفلة خلصت و الطلبة لموا الميكروفونات و العدة و خرجوا من الكلية و هما حاسيين بالرضا عن اللي عملوه
و اول ما خرجوا من باب الكلية حصل اللي حكيناعنه في اول البوست
عربية الاسعاف نزل منها بلطجية و طاحوا في الطلبة و مسكوا 13 طالب من طلبة طب و صيدلة و خدوهم ع القسم و رموهم هناك زي اي مجرم او نشال
الناس دي لو كانوا طالعين من حفلة لهيفا او نانسي كان هيتعمل فيهم كده ؟؟!!
لو كانوا بيلموا تبرعات تبع الروتاري او الليونز كان هيحصل فيهم كده ؟؟!!
حسبي الله و نعم الوكيل
الناس دي لسه ما طلعتش لغاية دلوقتي
ربنا يفك سجنهم و يطلعوا ان شاء الله
..............................................................................
صور من المظاهرات اللي طلعت في المجمع الطبي تاني يوم تضامنا مع الطلبة المعتقلين
...................................................................................
هناك تعليق واحد:
أولاً مبروك ع البلوج
ثانيًا، رغم إن الإخوان بيلبخوا كتير، من حيث إن هم ف بعض الأحيان بيقولوا كلام و يرجعوا فيه، إنما أنا عجبني اللي هما عملوه، بس مع الأسف أداروه بطريقة غلط ..
مش عارف كان المفروض يعملوا إيه، لأن أي حد بيتكلم ف بلدنا بيتلب، بس بشكل أو بآخر كان حيبقي في طريقة
ربنا يفك سجن المحبوسين
إرسال تعليق